Саламаттык сактоо министрлигине караштуу милдеттүү медициналык камсыздандыруу фонду

Оскомбаева Клара Тургунбековна, Милдеттүү медициналык камсыздандыруу фондунун төрагасынын биринчи орун басары.

Клара Тургунбековна ММК Фондунун милдети жана кылган иши жөнүндө кыскача маалымат менен бөлүштү.

Саламатсыздарбы, урматтуу Кыргыз Республикасынын жарандары, урматтуу телекөрүүчүлөр, урматтуу радиоугуучулар!

Менин атым Клара Оскомбаева, Милдеттүү медициналык камсыздандыруу фондунун төрагасынын биринчи орун басары болом.

Уруксат берсеңиздер мен сиздерге бүгүн биздин мекеме жасап жаткан иши жөнүндө кыскача айтып берейин.

Эң негизги Милдеттүү медициналык камсыздандыруу фонду 1996 жылы Президенттин жарлыгынын негизинде уюштурулган. Кыргызстанга милдеттүү медициналык камсыздандыруу системасынын киргизүү максатында, медициналык кызматтар жеткиликтүү болушу учун киргизилген. Андан бери 25 жыл өттү. Биздин фондубуздун максаты, тилегибиз – ар бир кыргыз жараны медициналык кызматтарга жеткиликтүү болуусу, медициналык кызматтардын сапаты жогору болуусу жана биздин кыргыз элибиздин ден соолугун жакшыртуу үчүн медициналык мекемелерди финансы жана каржылоо жактан, алардын жасаган иштерин колдоп кетүү үчүн бүткүл саламаттык сактоо уюмдарынын бюджетинин баары Милдеттүү медициналык фондуна келип, ушул жерде топтолуп, анан жасаган кызматтарына жараша таркалат.

Кыргыз мамлекети тарабынан ар бир кыргыз жараны баштапкы медициналык-санитардык деңгээлде негизги медициналык кызматынын тобуна ээ болду. Ал үчүн республикалык бюджеттен акча каржыланат. Мисалы ар бир кыргыз жараны үйбүлөлүк дарыгерлер топторуна жаздырылгансыңар, каттоодон өттүңөр. Ошол үчүн биздин дарыгерлер сизди кабыл алышат. Эң негизги 11 лаборатордук анализдер бекер, анын баары мамлекеттик кепилдик программасында жазылган. Андан тышкары биздин медициналык кызматтарыбыз элибизге жөнөкөй, жакшыраак шарттарды түзүү боюнча дагы кошумча программа уюштурулган. Бул эмне деген программа? Ар бир камсыздырылган адам амбулатордук деңгээлде дарыканадан дарыларды жеңилдетилген түрдө алса болот. Ал үчүн сиз керектүү учурда үй-бүлөлүк дарыгерге барып, алар сизге рецепт жазып беришет. Ошол рецепттер менен дарыканага кайрылсаңар, дарыканадан сизге жеңилдетилген түрдө арзан баада дарыларды бериши мүмкүн. Ошол дарылардын калган баасы ММК Фонду тарабынан төлөнөт.

Азыркы учурда 6,5 миллион кыргыз элинин калкында 4 миллион 200 миң камсыздырылган кишилер тузөт. Буга албетте биринчи убакытта балдарыбыз жана пенсияга чыккан улуу адамдарыбыз киришет. Камсыздандыруу үчүн республикалык бюджеттен дагы акча каржыланат.

Биз, иштеген кишилер дагы камсыздандырылгандардын арасына киребиз, анткени, ар бир иштеген адам үчүн өзүнүн иш берүүчү мекемеси айлыгынан 2% төлөйт. Бирок 2% адамдардын айлыгынан кармалбайт, бул мекеме өзүнүн кирешесинин эсебинен төлөйт. Бүгүнкү күндө иштеп жаткан кишилер өзүнүн айлыгынан камсыздандыруу төлөмдөрдү төлөбөйт. Жыл сайын Милдеттүү медициналык камсыздандыруу фондунун бюджети Кыргыз Республикасынын мыйзамы менен бекитилет. Ошонун ичинен бир топ каражат биздин гемодиализ, бешинчи баскычтагы өнөкөт бөйрөктүн жетишсиздиги менен ооруган адамдарга каралган. Беш жыл мурункусун алсак ушундай оору менен ооруган 180 эле адам болчу. Бүгүнкү күндө 2200 кишиге жетти. Ар бир бейтап жумасына үч жолу диализ сеанс алганга муктаж. Ошонун барына өкмөт акча каражатын бөлүп жатат. Бүгүнкү күндө 2 миллиард сомго жакын каражат жалаң гемодиализ кызматтарына төлөө үчүн бекитилип, каралган. Өнөкөт бөйрөк жетишсиздиги менен ооругандар жашаган же турган жерине карабастан эң жакын жайгашкан гемодиализ борборуна барып эле сеанстарды алса болот. Ар бирөөсү менен келишим түзгөнбүз, бүгүнкү күндө Кыргызстан боюнча 33 менчик гемодиализ борбору иштеп жатат. Бейтаптар каалаган борборго барып кызматтарды алса болот. Баарыбыз түшүнүп жаткандай эне аман болсо, бала аман болот. Кош бойлуу айымдарыбыз дагы Кыргыз мамлекети тарабынан акысыз кызматтарга ээ. Ошол үчүн камсыздырылган же камсыздырылбаганына карабастан сиз өзүңүздүн үй-бүлөлүк дарыгерге барып учётко турсаңыз, кош бойлуу айымдарга жеңилдетилген рецептерге жазышы мүмкүн. Ошол рецептер менен сизге ошол учурда керектүү дарыларды биздин дарыканалардан барып жеңилдетүү түрдө алсанар болот.



Эгерде биздин элибиздин ар кандай нааразычылык же суроолор болсо ММК Фондунун “113” деген телефону иштейт, чалуулар акысыз, милдеттүү түрдө сизге жооп беребиз. Ошол үчүн тартынбай чалыңыз, сиз айткан сайын биз дагы ошону билип турабыз. Биздин элибиз керектүү, сапаттуу медициналык жардамга ээ болуу үчүн биз колубуздан келген чараларды көрөбүз жана аракет кылабыз. Ал үчүн нечендеген медик адистерибиз медициналык кызматтарынын сапатын көзөмөлдөшөт жана милдеттеринин аткарылышы үчүн биз иштеп жатабыз. Аягында кыргыз элибизге кайрылып кетейин: саламаттуу сактуу болуңуздар, өзүңүздөр өзүңүздөрдү сактаңыздар, аман болуңуздар!